• Dünya çempionu ilə diaspor təşkilatında görüş keçirilibDünya çempionu ilə diaspor təşkilatında görüş keçirilib
  • Frankfurt Beynəlxalq Kitab Sərgisi çərçivəsində Frankfurt Beynəlxalq Kitab Sərgisi çərçivəsində "Azərbaycan Odlar Yurdu" adlı tədbir keçirilib
  •  Frankfurt Beynəlxalq Kitab Sərgisi çərçivəsində Nizami Gəncəvinin yaradıcılığına həsr olunmuş tədbir keçirilib Frankfurt Beynəlxalq Kitab Sərgisi çərçivəsində Nizami Gəncəvinin yaradıcılığına həsr olunmuş tədbir keçirilib
  • Oktyabrın 9-u dövlətimizin başçısı İlham Əliyevin üçüncü dəfə Prezident seçildiyi gündürOktyabrın 9-u dövlətimizin başçısı İlham Əliyevin üçüncü dəfə Prezident seçildiyi gündür
  • "The Jerusalem Post" qəzetində "Ermənistan Cənubi Qafqazda yox olmaq həddinə çatmış dövlətdir" adlı məqalə dərc olunub


GÜRCÜSTAN AZƏRBAYCANLI GƏNCLƏRİN I QURULTAYI


     2010-cu ilin may ayının 15-də Marneuli şəhərində Gürcüstan azərbaycanlı gənclərinin I qurultayı keçirilmişdir. Qurultayda Azərbaycan Respublikasının Gürcüstandakı Fövqəladə və səlahiyyətli səfiri Namiq Əliyev, Milli Məclisin deputatları Qənirə Paşayeva, Rauf Əliyev, Sabir Hacıyev, Gürcüstan parlamentinin üzvü Azər Süleymanov, Kvemo-Kartli qubernatorunun müavinləri Hüseyn Yusifov, Koba Kubiaşvili, Diasporla İş üzrə Dövlət Komitəsinin əməkdaşları qonaq qismində iştirak etmişlər.

      Gürcüstan azərbaycanlı gənclərinin I qurultayının təşəbbüs qrupunun rəhbəri Leyla Məmmədova çıxış edərək, qurultayın çağırılmasının məqsədi barədə məlumat vermişdir. O, qeyd etmişdir ki, bu toplantının əsas məqsədi Gürcüstanın azərbaycanlı gənclərini bir araya gətirmək və onların cəmiyyətə inteqrasiyası sahəsində ardıcıl layihələr həyata keçirməkdən ibarətdir. L.Məmmədova qurultayda 202 nəfər nümayəndədən 165 nəfərin iştirak etdiyini bildirmişdir. O, qurultayın işində Gürcüstadakı azərbaycanlı gənclər tərəfindən təsis olunmuş 18 təşkilatın nümayəndəsinin iştirak etdiyini diqqətə çatdırmışdır. Bildirilmişdir ki, toplantıda Gürcüstanın azərbaycanlılar yaşayan bütün bölgələri təmsil olunur.

      Qurultayda çıxış edən Azərbaycan Respublikasının Gürcüstandakı səfiri Namiq Əliyev  Azərbaycan Respublikasının Prezidenti cənab İlham Əliyevin qurultay iştirakçılarına salamlarını çatdırmışdır. O, tədbirin əhəmiyyətini yüksək qiymətləndirmiş və toplantının azərbaycanlı gənclərin cəmiyyətə inteqrasiyasına önəmli töhfələr verəcəyinə inamını ifadə etmişdir.

      Milli Məclisin deputatı Qənirə Paşayeva son illərdə Gürcüstanda azərbaycanlıların problemlərinin həlli sahəsində bir sıra uğurla layihələrin həyata keçirildiyini qeyd etmişdir. O, demişdir ki, Heydər Əliyev Fondu, Diasporla İş üzrə Dövlət Komitəsi, ARDNŞ və digər təşkilatlar tərəfindən həyata keçirilən bu layihələr azərbaycanlıların cəmiyyətə inteqrasiyasını stimullaşdırır. Q.Paşayeva Gürcüstanın Azərbaycandilli məktəblərində Gürcü dilli kurslarının açılması nəticəsində dövlət dilini bilən yeni kadrların yetişdiyini vurğulamışdır. Millət vəkili qurultayın azərbaycanlı gənclərin həyatında mühüm bir hadisə  kimi tarixə düşəcəyinə inandığını bildirmişdir.

      Diasorla İş üzrə Dövlət Komitəsinin şöbə müdiri Füzuli  Nəcəfov qurultayın azərbaycanlı gənclərin problemlərinin həllinə layiqli töhfələr verəcəyinə inandığını bildirmişdir. O, qeyd etmişdir ki, Gürcüstanda yaşayan azərbaycanlıların problemləri daim Azərbaycan dövlətinin diqqət mərkəzindədir və son illərdə bu sahədə həyata keçirilən bir sıra layihələr bunun parlaq sübutudur. F.Nəcəfov qurultayda azərbaycanlılar yaşayan bütün bölgələrin  və azərbaycanlı gənclər tərəfindən təsis olunmuş əksər QHT-lərin nümayəndələrinin iştirakını yüksək qiymətləndirmişdir.

      Qurultayda çıxış edən Kvemo-Kartli qubernatorunun müavini Koba Kubiaşvili bu toplantının Gürcüstan hökuməti tərəfindən  təqdir olunduğunu diqqətə çatdırmışdır. O, qeyd etmişdir ki, azərbaycanlı gənclərin dövlət dilini bilməməsi əsas problemlərdən biri olaraq qalır və bu problemin həlli istiqamətində  Azərbaycan dövlətinin həyata keçirdiyi tədbirlər təqdirəlayiqdir. K.Kubiaşvili eyni zamanda, azərbaycanlı gənclərin təhsil səviyyəsinin  artırılması, ali məktəblərə qəbuluna daha yaxşı şərait yaradılması üçün Gürcüstan dövlətinin zəruri tədbirlər həyata keçirdiyini vurğulamışdır. O, azərbaycanlı və gürcü gənclərin daha yüksək səviyyəli təhsil alması üçün Rustavi şəhərində Avropa standartlarına uyğun universitetin açılmasını təklif etmiş və bu işə dəstək verilməsi üçün həmin təklifin Azərbaycan Respublikasının müvafiq dövlət orqanlarına çatdırılmasını xahiş etmişdir.

      Toplantıda çıxış edən Gürcüstan parlamentinin deputatı Azər Süleymanov Gürcüstanda Gürcü Dilini bilən azərbaycanıların sayının kifayət qədər olduğunu vurğulamışdır. O, qeyd etmişdir ki, azərbaycanlıların  işlə təmin olunmasına, dövlət strukturlarında təmsilçiliyinə maneə yaradan əsas amil dil problemi deyil.

     Toplantıda həmçinin Azərbaycan Respublikası Milli Məclisinin deputatları Rauf Əliyev, Sabir Hacıyev, Kvemo-Kartli qubernatorunun müavini Hüseyn Yusifov və digərləri çıxış edərək gənclərə uğurlar arzulamışlar.

     Qurultayda çıxış edən gənclər təşkilatının nümayəndələri onları narahat edən problemlərdən danışmış, azərbaycanlıların cəmiyyətə inteqrasiyası sahəsində həyata keçirilmiş layihələri təqdir etdiklərini bildirmişlər. Çıxışlarda bəzi gənclərin dövlət dilini bilməməsi, dövlət idarəçiliyində soydaşlarımızın məhdud şəkildə təmsil olunması, hüquqi maarifləndirmə sahəsində mövcud olan çətinliklər, insan hüquqlarının pozulması halları ilə bağlı bir sıra problemlərə toxunulmuşdur. Çıxış edənlər Gürcüstan azərbaycanlı gənclərinin I qurultayının çağırılmasını mühüm tarixi hadisə kimi qiymətləndirmişlər.

      Çıxışlarda qurultayın gündəliyinə daxil edilmiş Gürcüstan Azərbaycanlı Gənclərinin İttifaqının yaradılması məsələsi müzakirə olunmuşdur. İştirakçılar belə bir qurumun yaradılmasının zəruri olduğunu bildirmişlər. Gənclər təşkilatlarının nümayəndələrinin yeni yaradılacaq qurumun azərbaycanlı gənclərin problemlərinin həlli, cəmiyyətə inteqrasiyası sahəsində uğurlu layihələr həyata keçirəcəyinə inandıqlarını dilə gətirmişlər. Müzakirələrin nəticəsi olaraq, Gürcüstan Azərbaycanlı Gənclərinin İttifaqının Nizamnaməsi səsə qoyulmuş və böyük səs çoxluğu ilə təsdiq edilmişdir. Daha sonra Nizamnaməyə uyğun olaraq 13 nəfərdən ibarət İdarə Heyəti seçilmişdir.

    Toplatıda Gürcüstan azərbaycanlı gənclərinin I qurultayının iştirakçıları adından Azərbaycan Respublikasının Prezidenti cənab İlham Əliyevə və Gürcüstan Prezidenti Mixail Saakaşviliyə müraciətlər qəbul edilmişdir.

    Toplantının sonunda Gürcüstanın Azərbaycanlı Gənclər İttifaqının İdarə Heyətinin iclası keçirilmiş və Gürcüstan Azərbaycanlılarının Mədəniyyət Mərkəzinin QHT-lərə iş sektorunun rəhbəri Leyla Məmmədova İdarə Heyətinin sədri seçilmişdir. Bununla da qurultay öz işini başa çatdırmışdır.

 

 

 

MEDİATEKA
VEB LAYİHƏLƏR


Azərbaycan Respublikası Diasporla İş Üzrə Dövlət Komitəsi. All rights reserved